Med venninner til fotografen

Til atelieret på Berge kom det mange for å ta bilete. Dei første åra var det mest enkeltpersonar eller familier som kom med slikt ærend. Samstundes viser oppføringane i platebøkene at det var ganske vanleg at unge gutar og jenter kom fleire saman for å ta bilete. Dei tok først bilete kvar for seg, og så hender det at dei også tok eit bilete saman.

Seinare vert det også vanlegare at grupper kjem for berre å ta eit samla bilete, utan at det er snakk om bilete enkeltvis. Dette gjer identifiseringa av personar svært vanskeleg, og heilt avhengig av at ein kjenner personane att frå andre samanhengar.

Bilete er frå april 1921, registrert på Alma Vike. Dette er truleg Alma Halvdansdatter Vike født 1902. Ho gifta seg i 1928 med Johan Helge Hasund frå Ulstein. Dei fekk ein gut, Asbjørn Petter Hasund i 1930. Alma døde alt hausten 1931, og Johan flytta seinare til Osnes i Ulsteinvik.

På bilete sit Gudrun Larsen framme til venstre, og systra Erna Larsen står bak til høgre. Foreldra deira var Nils Morten Larsen og Ellen Karoline Evanger. Ellen døde i 1906 og borna vaks opp hjå besteforeldra i Evangerhuset på Eggesbønes.

Ingen av dei andre unge kvinnene er så langt identifisert, og heller ikkje kvifor dei var samla for å ta bilete. Det er også slik at det samstundes vart tatt eit bilete til. Fire av kvinnene på dette bilete er også med på det andre bilete (jf. neste bilete).

Dette bilete er registrert på “Frk. Brobakke”, noko som gjer det enno vanskelegare å identifisere personane. Kven “Frk. Brobakke” refererer til er ukjent. Anton Brobakke gifta seg med Gudrun Evanger i 1908, og budde i perioder på Eggesbønes. Men i 1921 var eldste døtra, Liv Brobakke, berre 12 år og neppe nokon av dei på dette bilete. Broren til Anton, Jakob Brobakke, kom også til Herøy på denne tida og gifta seg hausten 1921 med Mathilde Andreassen frå Andenes. Dei vart vigde i Ålesund (Blindheim), men busette seg på Myklebust.

Anton og Jakob Brobakke hadde på dette tidspunktet også to ugifte systre, Laura (f. 1892) og Alida (f. 1894). Dei kan ha vore på besøk på Eggesbønes, men det er umogleg å seie om “frk. Brobakke” refererer til ei av søstrene. Eventuelt om det kan vere meint Mathilde som sikkert var forlovet med Jakob på dette tidspunktet.

Som vi ser er det slik at dei to kvinnene som sit i stolane og dei to som står i midten bakpå dette bilete, er med på begge bileta (bytter dels posisjon). Dei tre andre kvinnene på dette bilete ‘erstatter’ tre på det første bilete.

Etter plateboka sine oppføringar, er det ikkje noko som tyder på at det har vore tatt andre bilete samstundes. Det einaste vi veit sikkert om desse to bileta er at dei var 10 unge kvinner som kom til atelieret saman. Vi kan også gå ut frå at Alma Vike er med på det første bilete (og kanskje på begge) og at det same gjeld for henne som vert omtalt som "Frk. Brobakke”.

Om nokon gjenkjenner dei unge kvinnene, vil vi bli takksame for informasjon!

Dette bilete er også frå 1921, tatt i juni månad, og registrert på Martha Hansen. På dette bilete er alle personane identifisert.

(Anne) Martha Eliasdatter Sande gifta seg i 1916 med Jens Hansen, og dei starta kolonialhandel og bakeri i Fosnavågen same året. Martha sit i midten bak på bilete. Til venstre for Martha har vi Marianne Hansen. Ho var systra til Jens og gifta seg seinare med Rasofiel Hatlø. Til høgre for Martha sit Sara Martinusdatter Bø. Ho gifta seg i 1919 med Jakob Sande, broren til Martha.

Frå høgre på golvet sit Agata (Hansen) Berge og Petra Eliasdatter Sande. Agata var syster til Jens og Marianne og gifta seg i 1904 med Gullik Berge. Petra var systra til Martha. Ho gifta seg i 1928 med Nikolai Sande og busette seg i Ålesund. Dei 5 var altså svigerinner.

Borna på bilete er også identifisert. Guten og jenta til venstre er borna til Agata og Gullik. Haldis født i 1913 og Mindor født i 1918. Guten fremst er Arne Elias Sande, født i 1919 og var sonen til Sara og Jakob. Martha og Jens var foreldre til dei to siste. Johanne, som nesten gøymer seg, var født i 1917 og Håkon var født i 1919. Håkon døydde alt i april 1922.

Den siste personen på bilete, ho som har Håkon på fanget, var det vanskeleg å identifisere. Ho er på fleire bilete saman med borna til Martha, og var etter folketellinga for 1920 tenestejente hjå at Jens og Martha. Namnet hennar var Astrid Leonora Joakimsdatter Skeide frå Ulsteinvik!

Bilete er tatt i juli 1921, og registert på Selma Stenersen.

Britt-Unni Sporsheim har sendt meg opplysningar om personane på dette bilete, som ho meinar er godt sammensurium av slekter, inngifte og naboer som alle var relatert til Mallabakken, eller det som no heiter Tollåsbakken.

 Personane på bilete er:

  1.  Selma Tobiasdatter Myklebust f. 1886,  gift 1903 med Jakob P. Stenersen.

  2.  Margit  f. 1917, ho er dotter av Selma og Jakob.

  3.  Erling Jakobsson f. 1919, han er son av  Selma og Jakob.

  4.  Jenny  Sunndalskleiv f. 1895, gift 1916 med Gustav P. Stenersen.

  5.    Maren f. 1917, ho er dotter av Jenny og Gustav.

  6.    Sigmund f.1919, han er son av Jenny og Gustav.

  7.    Anna P. Stenersen f. 1886,  gift 1914 med Karl Frantsen. Enno ingen born.

  8.    Augusta Tolleivsdtr. Foss f. 1894, gift i Oregon, USA med Gustav Frantsen.

  9.    Arthur «Bassar» f. 1917 i Oregon, han er son av Augusta og Gustav.

  10.    Paula Eilertsdtr. Notøy f. 1898, gift 1923 med Rasmus J. Almestad.

  11.    Dette er usikkert, men kan vere Ellen Nilsdtr. Frantsen f. 1902.

    Selma, Jenny og Anna var altså svigerinner i Stenersenfamilien. Sameleis var Anna og Augusta svigerinner i Frantsenfamilien. Dei to var tanter til Ellen (Nils, Karl og Gustav Frantsen var brødre). Paula Almestad var ikkje i familie med dei andre, men var ein nær nabo.

    Stor takk til Britt-Unni for opplysningar! Hennar mormor, Berte Nilsdatter Frantsen (gift Røren) var søster til Nils, Karl og Gustav Frantsen.

Bilete frå mai 1922 registrert på Hjørdis Johannessen. Dette må vere dotter til Knut og Berte Johannessen. Hjørdis var født i 1903 og hadde ei yngre søster, Margit, født i 1909.

Hjelp til meir sikker identifisering er kjærkome!

Nok eit bilete frå 1922 registrert på Jenny Vike, dotter til Nils og Oluffa Vike. Ho var født i 1905, og gifta seg seinare med Leif Antonsen Sollied og busette seg på Vestnes.

Ingen på bilete er så langt identifisert!

Bilete er frå september 1924 og registrert på Inga Nedrelid. Inga står bak til høgre på bilete. Ho var dotter til Anna og Mons Paulsen Nedrelid frå Sande. Inga Pernille gifta seg med enkemannen Hjalmar Tryggvason (frå Island) i 1928. Flytta til Sande i 1932 etter å ha budd på Eggesbønes nokre år.

Tommasine Stenersen (gift med Nils N. Huldal i 1930) står bak til venstre.

I tillegg kan Pauline Myklebust og Kaspara Fosnavåg vere med på bilete.

I november 1933 kom denne gruppa med kvitkledde venninner til atelieret på Berge. Bilete er registrert på Antonia Remøy og venninnene ser ut til å vere kledd i sine konfirmasjonskjolar.

I kyrkjeboka kan ein lese at det var 7 jenter frå Remøy og Sævik som vart konfirmert 17. september 1933. Ei av dei var Antonia Remøy som er fremst på bilete (med briller). Antonia tok samstundes bilete åleine. Dette bilete finst også i arkivet.

Det same gjeld også for Berthe Jørgine Remøy (bak til venstre), Marie Beate Remøy (nr. 3 frå venstre bak) og Anny Charlotte Sævik (sit til høgre).

Bileta til dei 3 siste på bilete er ikkje i arkivet. Dette gjeld Harriet Remøy som står heilt til høgre, Agny Charlotte Remøy som står som nr. 2 frå venstre og Dagny Charlotte Sævik som sit i midten framme.

Takk til Helge Håberg for hjelp med plasseringa til dei tre siste!

Vi avsluttar denne samlinga av bilete med eit litt ‘nyare’ bilete. Det er registrert på Randi Sævik i juli 1943.

Utan at ein veit dette sikkert kan det vere snakk om deltakarar på eit av Randi Sævik sine gitarkurs.

Frå Britt-Unni Sporheim har eg fått namn på nokre av damene. Bak frå venstre står Ada Karoliusdtr. Paulsen (f. 1925,  gift Vågsholm), Elly Jonasdtr. Sørdal (f. 1925, gift Bendal), ukjent og (Mar)grethe Paulsdtr Nilsen, (f. 1926, gift Remme, flytta etter kvart til Stavanger).

Framme frå venstre sit Dagfrid Paulsdtr. Vorren f. 1926), ukjent, Randi Sævik og ukjent.

Om nokon kjenner dei andre damene på bilete blir informasjon mottatt med stor glede!